“वीज खांबावरील अपघाताने उद्ध्वस्त झाला संसार; पत्नी व चिमुकल्याच्या भवितव्यावर प्रश्नचिन्ह”
“वीज बंद असल्याचे सांगितले… पण खांबावर चढताच लागला करंट”
पत्नी, 1 वर्षीय चिमुकला मुलगा आणि संसाराची जबाबदारी; अपघातानंतर कुटुंबावर संकटाचा डोंगर
पहूर, ता. जामनेर (प्रतिनिधी) : घरातील एकमेव कमावता सदस्य असलेल्या 23 वर्षीय तरुणाच्या आयुष्याला एका कथित निष्काळजीपणामुळे मोठा धक्का बसल्याची घटना जामनेर तालुक्यातील पहूर परिसरात घडली आहे. वीज खांबावरील दुरुस्तीचे काम करत असताना अचानक वीजप्रवाह सुरू झाल्याने रोहित हरीष ढाकरे यांना जोरदार विद्युत धक्का बसला आणि ते खांबावरून खाली कोसळले. या अपघातात गंभीर दुखापत होऊन त्यांना अपंगत्व आल्याचे सांगण्यात येत आहे.
मिळालेल्या माहितीनुसार, रोहित ढाकरे हे महावितरणच्या बाह्य स्त्रोतावरील कामगार म्हणून काम करत होते. 10 फेब्रुवारी 2026 रोजी पहूर परिसरातील 11 केव्ही वीजवाहिनीवरील दुरुस्तीचे काम सुरू असताना वीजपुरवठा बंद करण्यात आल्याचे सांगण्यात आले. त्यानंतर रोहित हे खांबावर चढून काम करत असताना अचानक वीजप्रवाह सुरू झाला. या धक्क्याने ते खाली कोसळले आणि गंभीर जखमी झाले.
अपघातानंतर त्यांच्यावर पहूर, जळगाव आणि पुढे मुंबई येथे उपचार करण्यात आले. मात्र या घटनेत त्यांना कायमस्वरूपी अपंगत्व आल्याचा दावा करण्यात आला आहे. त्यामुळे केवळ रोहितच नव्हे तर त्यांच्या संपूर्ण कुटुंबाचे आयुष्यच संकटात सापडले आहे.
पत्नी आणि 1 वर्षीय मुलाच्या भविष्याचा प्रश्न
रोहित यांच्या कुटुंबात पत्नी आणि अवघा एक वर्षाचा मुलगा आहे. घरातील आर्थिक जबाबदारी पूर्णपणे रोहित यांच्या खांद्यावर होती. मात्र अपघातानंतर त्यांची काम करण्याची क्षमता बाधित झाल्याने कुटुंबाच्या उदरनिर्वाहाचा प्रश्न निर्माण झाला आहे. उपचारासाठी झालेला खर्च, भविष्यातील वैद्यकीय गरजा आणि मुलाच्या संगोपनाची चिंता यामुळे कुटुंब प्रचंड मानसिक तणावाखाली असल्याचे सांगितले जाते.
“जबाबदार कोण?”
या प्रकरणी संबंधित वरीष्ठ तंत्रज्ञ गोविंद सुखलाल धनगर यांच्या विरोधात पहूर पोलिस ठाण्यात भारतीय न्याय संहिता कलम 125 (ब) अंतर्गत गुन्हा दाखल करण्यात आला आहे. घटनेमागील निष्काळजीपणा आणि जबाबदारी निश्चित करण्यासाठी पोलिस तपास सुरू आहे.
न्याय आणि नुकसानभरपाईची मागणी
दरम्यान, तक्रारदार रोहित ढाकरे यांनी संबंधित दोषींवर कठोर कारवाई करण्यात यावी तसेच अपघातामुळे झालेले शारीरिक, मानसिक आणि आर्थिक नुकसान लक्षात घेऊन त्यांना योग्य नुकसानभरपाई देण्यात यावी, अशी मागणी केली आहे.
एका क्षणाच्या कथित निष्काळजीपणामुळे एका तरुणाचे आयुष्य उद्ध्वस्त झाले, तर पत्नी आणि एका वर्षाच्या चिमुकल्याच्या भविष्यावरही प्रश्नचिन्ह निर्माण झाले आहे. आता या कुटुंबाला न्याय आणि आधार मिळणार का, याकडे सर्वांचे लक्ष लागले आहे.
About the Author
