जळगावात गॅस वितरणावर कडक निर्देश; होम डिलिव्हरी बंधनकारक

जळगाव जिल्हाधिकारी कार्यालयाकडून घरगुती गॅस वितरणाबाबत महत्त्वाचे निर्देश जारी करण्यात आले आहेत. नागरिकांच्या तक्रारींच्या पार्श्वभूमीवर गॅस एजन्सींनी नियमांचे काटेकोर पालन करावे, असे स्पष्ट करण्यात आले आहे.

पत्रानुसार, गॅस वितरणामध्ये होम डिलिव्हरी व्यवस्था प्रभावीपणे राबवणे बंधनकारक करण्यात आले आहे. ग्राहकांना एजन्सीवर रांगेत उभे राहण्यास भाग पाडू नये, तसेच वेटिंग लिस्ट पारदर्शक ठेवावी, असेही आदेश देण्यात आले आहेत.

तसेच, व्यावसायिक वापरासाठी घरगुती गॅसचा गैरवापर रोखण्यावर भर देण्यात आला असून, यावर कडक कारवाई करण्याचे निर्देश देण्यात आले आहेत. गॅस सिलेंडर वितरणात कोणतीही अनियमितता आढळल्यास संबंधितांवर कठोर कारवाई होणार असल्याचे प्रशासनाने स्पष्ट केले आहे.

दरम्यान, नागरिकांना सुरळीत सेवा देण्यासाठी HPCL, BPCL आणि IOCL कंपन्यांनी आवश्यक समन्वय साधावा, असेही आदेशात नमूद करण्यात आले आहे.

या निर्देशांमुळे गॅस वितरणातील गोंधळ कमी होईल का, याकडे आता नागरिकांचे लक्ष लागले आहे.