जामनेर (प्रतिनिधी) — जामनेर नगरपरिषदेच्या वतीने रविवार, दि. १२ ऑक्टोबर रोजी होणाऱ्या भव्य लोकार्पण सोहळ्याची जोरदार चर्चा शहरात रंगली आहे. ₹७ कोटींहून अधिक खर्चाच्या विविध विकासकामांचे उद्घाटन जलसंपदा मंत्री गिरीश महाजन यांच्या हस्ते होणार आहे. मात्र, हा कार्यक्रम आगामी स्थानिक स्वराज्य निवडणुकांच्या तोंडावर होत असल्याने राजकीय रंग चढला आहे.
कार्यक्रमास मा. सौ. साधनाताई महाजन, नगराध्यक्षा, जामनेर नगरपरिषद विशेष उपस्थित राहणार असून सर्व माजी नगरसेवक, पदाधिकारी व नागरिक मोठ्या संख्येने सहभागी होणार आहेत.
नगरपरिषदेच्या वतीने शहरातील विविध भागांत सौंदर्यीकरण, व्यायामशाळा, क्लब हाऊस, कुस्ती आखाडा आणि खुल्या जागांचे विकासकामे हाती घेण्यात आली आहेत. या कामांवर एकूण ₹700 लाखांहून अधिक निधी खर्च करण्यात आला आहे.
प्रमुख कामांमध्ये लक्ष्मी कॉलनीतील कंपाउंड वॉल, गिरिजा कॉलनीतील क्लब हाऊस, पाचोरा रोडवरील विकासकामे, शिव कॉलनीतील बगीचा विकास, मधुबन कॉलनीतील खुल्या जागांचे सौंदर्यीकरण, तसेच विवेकानंद नगर व इतर ठिकाणांवरील व्यायामशाळा आणि कुस्ती आखाडा बांधकामाचा समावेश आहे.
या सर्व प्रकल्पांमुळे जामनेर शहराचे शहरी सौंदर्य आणि नागरिकांसाठीची सुविधा अधिक बळकट होणार असून, नागरिकांमध्ये या लोकार्पण सोहळ्याबद्दल मोठा उत्साह दिसून येत आहे.
नगरपरिषदेने सौंदर्यीकरण, क्लब हाऊस, व्यायामशाळा, बगीचा विकास आणि कुस्ती आखाडा यांसारख्या कामांचा लोकार्पण सोहळा आयोजित केला असला, तरी या उपक्रमांमागे राजकीय हेतू असल्याचा आरोप विरोधकांकडून पुढे येण्याची शक्यता आहे. शहरात सर्वत्र चर्चा आहे की, हे लोकार्पण सत्ताधाऱ्यांसाठी जनतेत “विकासाची प्रतिमा” मजबूत करण्याचा प्रयत्न आहे.
राजकीय जाणकारांचे म्हणणे आहे की, या कार्यक्रमातून सत्ताधारी गटाला नक्कीच फायदा होऊ शकतो. मात्र, विरोधक हा मुद्दा कसा उचलतात आणि लोकांपर्यंत कसा पोहोचवतात, हे पाहणे उत्सुकतेचे ठरणार आहे.
आगामी निवडणुकीच्या पार्श्वभूमीवर जामनेरमध्ये विकास आणि राजकारण यांचा संगम दिसत असून, या लोकार्पण सोहळ्याने स्थानिक राजकीय वातावरण चांगलेच तापवले आहे.
+ There are no comments
Add yours